Më duhet të besoj se ajo është e vetmja që ka pranuar dhe ka marrë kartolina për ditëlindje, disa prej tyre me shkrim dore, letra të ndjera dhe të sinqerta, komunikime të shenjtëruara në fjalë të përzemërta e kumtime të zëshme zemre të dlirë e shpirti të dritur në mirësim. Gjithmonë ajo e vlerësoi këtë zëshmëri si një dhuratë dhe e tillë ishte nga unë për të. Gjithnjë pata fjalë të zemërta për të stolisur me mall dhe ndijim, sepse e pata një mike të mirë në gazmim e hidhërim. Për shumë gjëra nuk dakordësoheshim, siç çmonim te njëri-tjetri cilësitë dhe virtytet, në themel të së cilave qëndron vështirësia dhe pamundësitë ku u rritëm.
E shtrenjta mikja ime, Albina J. Gjergji
përulësisht i drejtohem begatisë suaj shpirterore t’i bëjë vend një vullneti të shëlbyer përkorjeve të mirësisë dhe dlirësisë, atij të ofrimit përmes fjalës, përzemërsinë e një urimi, sot në ditëlindjen tuaj.
Është një ditëlindje, ndoshta krejt ndryshe nga të tjerat, kjo ngase fati është gati të të shpërblejë me një jetë të re, dhe dëshirimi juaj I ka hapur zemrën preludit të shenjtërimit të një guraje.
Kësisoj kjo ditëlindje është për ty një kremte që takohet tek ju me gazmimin e zemrës së një fëmije dhe dlirësisë së një drite mëngjesi. Bashkë më çdo fjalë dhe andje, sjell me këtë urim lavden e atij gazmimi me gjithë zemër, që kjo ditë e lindjes suaj të jetë ditë e dritshme nga ato drita që kanë shpërthyer brenda teje diellin e dëshirimeve dhe përjetimeve.
Mikja ime unë kam çmuar tek ju bardhësinë e shpirtit, zemrën e pastër dhe atë fëmijën e ndrojtur dhe shpesh të shkujdesur, dhe kjo ka ushqyer tek unë atë mirënjohje që i detyrohem mundësisë që ka bërë juve pjesë e jetës sime, njohjeve të mia, dhe asaj të shtrenjtes afrisë shpirtërore.
Ajo që kam çmuar dhe që vazhdon ta ushqejë me përkorje miqësinë tonë është sinqeriteti, me të cilin komunikojmë dhe tek i cili besojmë.
Ti ke qenë dhe je një mike që ka zënë një vend të konsiderueshëm tek unë. Edhe unë jam përpjekur ta ushqej këtë përkorje me përkushtimin tim, me dashamirësinë dhe atë përzemërsi që i ngre në eter altaret e këtij fisnikërimi.
Zoti të shpërbleftë me mirësinë e asaj zemre që ka mylmyer shpirtin tuaj. Gëzofsh me harenë e një fëmijë. Shkëlqefshin në sytë e tu diejt e çdo dite që ka shpërthyer gazmueshëm tek ju. Në buzëqeshjen tënde vezullofshin të gjithë llamburitjet e qiejve idilik.
I puth duart e asaj nëne që të ka bekuar me atë çfarë në shpirtin tënd driton.
(17 nëntor 2018)
Në vend të një kartonile urimi për miken dhe kolegen time, Albina J. Gjergjii, sot në ditëlindjen e saj
Jepu me gjithë shpirt asaj që e do me gjithë zemër dhe do të shohësh se përveçse e pasur do të jesh dhe e lumtur.
Jeta është gjithçka që ti kërkon prej saj;
… është gjithçka që gjendet brenda teje, në jehonën e zërit tënd që dëgjon sa herë ti ke nevojë për qiell;
…është në pëshpëritjet e hapave tu, sa herë që një fluturim të fton në përcaktimin e të tjerë kufinjsh që rrok liria jote;
…është në frymëmarrjen e gjetheve dhe drithëramat e petaleve të luleve, sa herë që ti ke nevojë për vullnesë përkujdesjeje dhe përkushtimi;
…është në gjithçka që ndjen përreth, sa herë ti ke nevojë për aurorën e hyjshme të njerezores që eternen kërkon në çdo prehër dashurie.
Nuk ka forcë të hyjshme apo përkufizime që tregojnë udhën e së vërtetës, jetën e merituar, zotërimin e gjithçkasë që të përket.
Kërko gjithçka tek vetja.
Gjithçka që do është gjithnjë me ty.
Beso në një zot që është brenda teje, në një zot që është gjithnjë me ty kur ti ke nevojë për të.
Ai është përgjithmonë ai zot që dëgjon lutjen tëndE.
Beso!
(17 nëntor 2016)
